കൊച്ചി: സിഎംആര്എല്-എക്സാലോജിക് കേസില് ഇ ഡി അന്വേഷണം തടയണമെന്നാവശ്യപ്പെട്ട് സിഎംആര്എല് നല്കിയ അപ്പീല് തള്ളി ഹൈക്കോടതി. എന്ഫോഴ്മെന്റ് ഡയറക്ടറേറ്റ് അന്വേഷണം തുടരാമെന്നും നിയമപരകമായ വിലക്കില്ലെന്നും ഹൈക്കോടതി വ്യക്തമാക്കി. സിംഗിള് ബെഞ്ച് ഉത്തരവ് ശരിവെച്ചാണ് ഹൈക്കോടതി ഡിവിഷന് ബെഞ്ചിന്റെ ഉത്തരവ്.
സിഎംആര്എല്-എക്സാലോജിക് കരാറില് ഇഡി അന്വേഷണം തുടരുന്നതിന് നിയമപരമായ വിലക്കില്ലെന്ന് കോടതി വ്യക്തമാക്കി. അപ്പീല് നല്കുന്നതിനായി അന്വേഷണത്തിന് രണ്ടാഴ്ച സാവകാശം വേണമെന്ന സിഎംആര്എല്ലിന്റെ ആവശ്യവും കോടതി തള്ളുകയായിരുന്നു. സിവില് അന്വേഷണവുമായി ഇഡിക്ക് മുന്നോട്ട് പോകാമെന്ന് പറഞ്ഞ കോടതി ക്രിമിനല് നടപടികള്ക്ക് വിലക്കുണ്ടെന്ന് വ്യക്തമാക്കി. സ്വത്ത് കണ്ടുകെട്ടലും അതിനുള്ള അന്വേഷണവുമാകാം. ഇതിന് കള്ളപ്പണ ഇടപാടിലേക്ക് നയിക്കുന്ന കുറ്റകൃത്യം ആവശ്യമില്ലെന്ന് കോടതി നിരീക്ഷിച്ചു.
എന്നാല് പ്രെഡിക്കേറ്റ് ഒഫന്സ് ഇല്ലാത്തതിനാല് പിഎംഎല്എ നിയമത്തിലെ മൂന്നും നാലും വകുപ്പ് അനുസരിച്ച് അറസ്റ്റ് ഉള്പ്പടെയുള്ള ക്രിമിനല് നടപടി ഇഡിക്ക് സ്വീകരിക്കാനാവില്ല. അപ്പീല് നല്കുന്നതിനായി രണ്ടാഴ്ചക്കാലത്തേക്ക് ഇഡിയുടെ തുടര് നടപടികള് തടയണമെന്ന സിഎംആര്എലിന്റെ ആവശ്യവും ഡിവിഷന് ബെഞ്ച് തള്ളി. ഡിവിഷന് ബെഞ്ച് വിധിക്കെതിരെ സിഎംആര്എല് ഉടന് സുപ്രീംകോടതിയെ സമീപിക്കും.
ആദ്യം മുതല് തന്നെ അന്വേഷണത്തെ തടസ്സപ്പെടുത്താന് ശ്രമം നടന്നിരുന്നുവെന്ന് ഷോണ് ജോര്ജ് പ്രതികരിച്ചു. വീണ ഈ നിമിഷം വരെ കോടതിയെ സമീപിച്ചിട്ടില്ല. ഇന്നും ആ ബാന്ധവം തുടരുന്നു എന്നതിന്റെ തെളിവാണിത്. കേരളം കണ്ട ഏറ്റവും ഏറ്റവും വലിയ അഴിമതിയാണിതെന്നും കേസുമായി ബന്ധപ്പെട്ട് നിയമപോരാട്ടം നടത്തുന്ന ബിജെപി നേതാവ് ഷോണ് ജോര്ജ് പറഞ്ഞു.
ഇ ഡിക്ക് അന്വേഷണവുമായി മുന്നോട്ട് പോകാമെന്ന് സിംഗിള് ബെഞ്ച് നേരത്തെ ഉത്തരവ് പുറപ്പെടുവിച്ചിരുന്നു. ഇത് ചോദ്യം ചെയ്ത് സിഎംആര്എല് അപ്പീല് നല്കുകയായിരുന്നു. അധികാരപരിധി മറികടന്നാണ് ഇഡിയുടെ അന്വേഷണമെന്നായിരുന്നു സിഎംആര്ലിന്റെ വാദം.
Content Highlights: The court has dismissed CMRL's appeal in the CMRL–Exalogic case, allowing the Enforcement Directorate to continue its investigation